Shiva Temples of Tamilnadu

கோவில் அமைப்பு

திருவிடைமருதூரில் உள்ள சிவாலயம் சுமார் 1200 வருடங்களுக்கு மேல் பழமையான ஒரு ஆலயமாகும். மருத மரத்தைத் தல விருட்சமாகக் கொண்ட மூன்று கோயில்கள் உள்ளன. வடக்கே ஸ்ரீசைலம் என்று அழைக்கப்படும் தலத்தை வடமருதூர் என்றும், தெற்கே திருநெல்வேலி மாவட்டத்தில் புடார்ச்சுனம் என்றழைக்கப்படும் திருப்புடை மருதூரும் உள்ளது. இவ்விரண்டிற்கும் நடுவே கும்பகோணம் மயிலாடுதுறை ரயில் மார்க்கத்தில் உள்ளது திருவிடைமருதூர்.

மூர்த்தி, தலம் மற்றும் தீர்த்தம் சிறப்பு

நெடிதுயர்ந்த கோபுரங்களும் நீண்ட பிரகாரங்களும் உடைய திருவிடைமருதூர் ஆலயம் மத்யார்ஜுனம் என்று வழங்குகிறது. மூர்த்தி, தலம் மற்றும் தீர்த்தம் ஆகிய மூன்றின் சிறப்புக்களாலேயே ஒரு கோயில் பெருமை பெறுகின்றது. அந்த வகையில் இந்தத் திருவிடைமருதூர் இறைவன் அருள்மிகு மஹாலிங்க சுவாமியின் சிறப்புக்கள் கணக்கில் அடங்கா.

பஞ்சலிங்கத் தலம்

தேரோடும் நான்கு வீதிகளின் கோடிகளிலும் விஸ்வநாதர், ஆத்மநாதர், ரிஷிபுரீஸ்வரர் மற்றும் சொக்கநாதர் ஆகியோருக்கு நான்கு சிவாலயங்களும் நடுவிலே மஹாலிங்கப் பெருமானும் அமர்ந்திருப்பதால் இத்தலம் பஞ்சலிங்கத் தலமென்றும் அழைக்கப்படுகிறது. மேலும் மேற்கே அமைந்துள்ள சொக்கநாதர் ஆலயத்திற்குத் தனிப் பெருமை ஒன்றுண்டு. மழையின்றி மக்கள் வறட்சியால் வருந்தும் காலங்களில் இப்பெருமானுக்கு சிறப்பாகப் பூசை வழி பாடுகளைச் செய்து, மேகராகக் குறிஞ்சிப் பண்களில் அமைந்த தேவாரப் பதிகங்களைப் பாராயணஞ் செய்வதால் மழை பொழிவது இன்றளவும் நடைபெற்று வரும் அதிசயமாகும்.இக்கோவில் 3 பிரகாரங்களைக் கொண்டதாகும். இம்மூன்று பிரகாரங்களிலும் வலம் வருதல் மிகவும் புனிதமானதாகக் கருதப்படுகிறது.

சுயம்பு லிங்கம்

இத்தலத்தில் உள்ள இறைவன் சுயம்பு லிங்க மூர்த்தியாகும். இறைவன் மகாலிங்கேஸ்வரர் தன்னைத்தானே அர்ச்சித்துக் கொண்டு பூஜா விதிகளை சப்தரிஷிகள் மற்றுமுள்ள முனிவர்களுக்கு போதித்து அருளிய தலம் திருவிடைமருதூர். மார்க்கண்டேய முனிவருக்கு அவரின் விருப்பப்படி அர்த்தநாரீஸ்வரர் உருவத்தில் இத்தலத்து இறைவன் காட்சி கொடுத்துள்ளார்.

மூகாம்பிகை சந்நிதி

இவ்வாலயத்தில் உள்ள மூகாம்பிகை சந்நிதி மிகவும் புகழ் பெற்றது. அம்பாள் சந்நிதிக்கு தெற்குப் பக்கம் இந்த மூகாம்பிகை சந்நிதி அமைந்துள்ளது. மூகாம்பிகை சந்நிதி அருகில் உள்ள மகாமேரு சந்நிதியில் பெளர்ணமியன்று மேருவுக்கு அபிஷேகம் செய்யப்படுகிறது. மூகாம்பிகைக்கு இந்தியாவில் திருவிடைமருதூரிலும், கர்நாடக மாநிலத்திலுள்ள கொல்லூரிலும் பட்டும் சந்நிதி இருப்பது குறிப்பிடத்தக்கது.

27 நக்ஷத்திரத்திற்கான லிங்கங்கள்

திருவொற்றியூரில் இருப்பது போல திருவிடைமருதூர் மஹாலிங்கஸ்வாமி கோவிலிலும் 27 நக்ஷத்திரத்திற்கான லிங்கங்கள் உள்ளன. சந்திரன் தனது 27 மனைவியருடன் திருவிடைமருதூர் வந்து தன் பெயரில் சோமதீர்த்தம் என்ற குளத்தை உருவாக்கி 27 நக்ஷத்திர லிங்கங்களை பிரதிஷ்டை செய்து நாள் தோறும் பூஜை செய்து, தனக்கு குரு பகவானால் ஏற்பட்ட சாபத்திலிருந்து விமோசனம் பெற்றான். இந்த லிங்கங்கள் ஸ்வாமி சந்நிதிக்கு போகும் வழியில் வல பக்கத்தில் உள்ளன. பன்னிரண்டு ராசி காரர்களும் அவரவர்களுக்குரிய நக்ஷத்திர பெயரில் அமைந்த லிங்கத்திற்கு அபிஷேக ஆராதனை செய்வதுடன் 27 நெய் விளக்கேற்றி வழிபட திருமண தடை, மக்கட் பேரு இல்லாமை, நோய்கள் நீங்கி, பறிபோன பதவிகள் அனைத்தும் கிடைத்திடும். சந்திரன் பேறு பெற்றதால் இத்தலம் சந்திர தலம் என்றும் அழைக்கப்படுகிறது. இங்குள்ள நவகிரஹ சந்நிதியில் சந்திரன் மட்டும் உயர்ந்து நின்று அருள் புரிகிறார்.