Shiva Temples of Tamilnadu

ஆலயச் சிறப்பும் வரலாறும்

தலப் பெருமை

இந்தியத் திருநாட்டில் மூன்று சிவஸ்தலங்கள் மாகாளம் என்ற பெயருடன் விளங்குகின்றன. அவை வடநாட்டிலுள்ள உஜ்ஜயினி மாகாளம், காவிரி தென்கரைத் தலமான அம்பர் மாகாளம் மற்றும் தொண்டை நாட்டுத் தலமான இரும்பை மாகாளம். இவற்றில் உஜ்ஜயினி மாகாளம் ஒரு தேவார வைப்புத் தலம். மற்ற இரண்டும் தேவாரப் பாடல் பெற்ற தலங்களாகும். இந்தியாவில் உள்ள 12 ஜோதிர்லிங்கத் தலங்களுள் உஜ்ஜயினியும் ஒன்று. இத்தலத்தின் இறைவன் மகாகாளேஸ்வரர். அம்பாளின் சக்தி பீடங்களில் முழங்கை விழுந்த இடமான இது மகோத்பலா பீடம் ஆகும்.

வரலாற்றுச் சிறப்பு

உஜ்ஜயினி இந்திய நாட்டில் பழங்காலத்திலிருந்தே மிகவும் புகழ் பெற்ற ஒரு நகரமாகும். புராண காலம், சரித்திர காலம், இராமாயண, மகாபாரத இதிகாசங்கள் காலம் ஆகிய கால கட்டங்களிலும் சிறப்பு வாய்ந்த தலம். தேவாமிர்தம் சிந்திய நான்கு புண்ணிய ஊர்களில் உஜ்ஜயினியும் ஒன்று. துவாபர யுகத்தில் உஜ்ஜயினியில் தான் சாந்தீப முனிவரிடம் கிருஷ்ணர், பலராமர், சுதாமர் ஆகியோர் பாடம் கற்றதாக வரலாறு. முன்காலத்தில் மாளவதேசத்தின் தலைநகராகவும், விக்கிரமாதித்திய மகாராஜாவின் தலைநகரமாகவும் உஜ்ஜயினி விளங்கியது. விக்கிரமாதித்தனும், அவனது மந்திரி பட்டியும் உஜ்ஜயினி காளியிடம் வரம் பெற்று சாகசங்கள் பல புரிந்து நாடாறு மாதம், காடாறு மாதம் என்று 2000 ஆண்டுகள் அரசாட்சி புரிந்த தலம். விக்கிரமாதித்தராஜாவின் தெய்வீக சிம்மாசனம் இருந்த இடம் இது.

மகாகாளி கோயில்

உஜ்ஜயினியில் மகாகாளர் கோயில் இருப்பது போலவே, மகாகாளி கோயிலும் சிப்ர நதிக்கரையில் உள்ளது. இக்காளி கோயிலும் மிகவும் பிரசித்தி பெற்றது. விக்கிரமாதித்திய மன்னனும், பட்டியும் இந்த மகா காளியிடம் வரம் பெற்றுத்தான், 2000 வருடங்கள் ஆட்சி புரிந்து பல சாகசங்கள் செய்ததாகக் கூறப்படுகின்றன. இந்த மகா காளிக்கு ஹரசித்திதேவி என்ற வேறு பெயரும் உண்டு.