Shiva Temples of Tamilnadu

தேவாரப் பாடல் பெற்ற சிவஸ்தலங்கள்


தென்னாடுடைய சிவனே போற்றி
எந்நாட்டவர்க்கும் இறைவா போற்றி

ஞானபரமேஸ்வரர் கோவில், திருநாலூர் மயானம்

தகவல் பலகை
சிவஸ்தலம் பெயர்திருநாலூர் மயானம்
இறைவன் பெயர்ஞானபரமேஸ்வரர்
இறைவி பெயர்ஞானாம்பிகை, பெரியநாயகி
பதிகம்திருஞானசம்பந்தர் - 1
எப்படிப் போவது கும்பகோணம் - குடவாசல் சாலை வழியில் திருச்சேறை என்ற பாடல் பெற்ற தலத்தை அடுத்து வருவது நாலூர் என்ற ஊர். இவ்வூர் ஒரு தேவார வைப்புத் தலம். நாலூர் தாண்டி குடவாசல் செல்லும் வழியில் உள்ள அத்திக்கடை பாலத்திற்கு முன்னால் இடதுபுறம் பிரியும் சாலையில் சிறிது தூரம் சென்றால் நாலூர் மயானம் என்ற இத்தலம் இருக்கிறது. இக்காலத்தில் இவ்விடம் திருமெய்ஞானம் என்று அழைக்கப்படுகிறது.
ஆலய முகவரிஅருள்மிகு ஞானபரமேஸ்வரர் திருக்கோயில்
நாலூர் மயானம்
திருமெய்ஞானம்
திருச்சேறை அஞ்சல்
கும்பகோணம் வட்டம்
நஞ்சாவூர் மாவட்டம்
PIN - 612605

இவ்வாலயம் தினந்தோறும் காலை 7 மணி முதல் 9 மணி வரையில் மட்டும் திறந்திருக்கும். மற்ற நேரங்களில் கோவில் அருகில் வசிக்கும் திரு கலியமூர்த்தி (கோவில் அறங்காவலர் குழுத் தலைவர்) குடும்பத்தினரைத் தொடர்பு கொண்டு தரிசிக்கலாம்.
கைபேசி: 9486767962, 7502056284
naalur mayanam route map

திருச்சேறையில் இருந்து நாலூர் மயானம் ஆலயம் செல்லும் வழி வரைபடம்
Map courtesy by: Google Maps

தேவாரப் பாடல் பெற்ற தலங்களில் நான்கு தலங்கள் மயானம் என்று அழைக்கப்படுகின்றன. அவையாவன - 1) நாலூர் மயானம், 2) திருக்கடவூர் மயானம், 3) காழி மயானம், 4) கச்சி மயானம். இவற்றில் முதல் மூன்றும் பாடல் பெற்ற தலங்கள். நான்காவது கச்சி மயானம் ஒரு தேவார வைப்புத் தலம்.

கும்பகோணம் - திருச்சேறை - குடவாசல் வழித்தடத்தில் திருச்சேறை என்ற பாடல் பெற்ற தலத்தை அடுத்து வருவது நாலூர் என்ற ஊர். இது ஒரு தேவார வைப்புத் தலம். இறைவன் பெயர் பலாசவனேஸ்வரர். நாலூர் என்ற இந்த ஊரைக் கடந்து அத்திக்கடை பாலத்திற்கு முன்னால் இடதுபுறம் பிரியும் சாலையில் சிறிது தூரம் சென்றால் நாலூர் மயானம் என்ற இத்தலம் இருக்கிறது. இக்காலத்தில் இவ்விடம் திருமெய்ஞானம் என்று அழைக்கப்படுகிறது. இந்த திருமெய்ஞானம் கிராமத்தில் அமைந்துள்ள ஞானபரமேஸ்வரர் திருக்கோவிலே திருநாலூர் மயானம் என்று திருஞானசம்பந்தர் பதிகம் பெற்ற பாடல் பெற்ற தலம். நான்கு வேதங்களாலும் வழிபடப்பட்ட இத்தலம் சோழர் காலத்தில் சதுர்வேதிமங்கலம் என்று வழங்கியது.

சோழர் காலத்து கட்டிடக் கலைப்பாணியில் அமைந்த இககோவில் கிழக்கு நோக்கி ஒரு முகப்பு வாயிலுடன் அமைந்துள்ளது. முகப்பு வாயிலுக்கு வெளியே நந்தி மண்டபமும், பலிபீடமும் உள்ளன. கோவிலுக்கு வெளியே ஞானதீர்த்தம் உள்ளது. வாயில் வழி உள் நுழைந்தால் வெளிப் பிரகாரம் உள்ளது. பிரகாரம் சுற்றி வரும்போது மேற்குச் சுற்றில் அமிர்தகடேஸ்வரர், சட்டநாதர், ஏகாம்பரேஸ்வரர், ஸ்ரீவீழிஅழகர் ஆகிய சிவலிங்கத் திருமேனிகள் வரிசையாக உள்ளன. அதையடுத்து நாகாராஜா, சண்டிகேஸ்வரி, புதிய தட்சிணாமூர்த்தி, ஆத்மலிங்கம் ஆகியவற்றைக் காணலாம். வள்ளி தெய்வானை சமேத முருகப் பெருமானின் சந்நிதியும் இப்பிரகாரத்தில் உள்ளது. வடக்குப் பிரகாரத்தில் கோஷ்டத்தில் விஷ்ணு துர்க்கையைக் காணலாம். நவக்கிரக சந்நிதியும் வெளிப் பிரகாரத்தில் உள்ளது.

பிரகாரச் சுற்று முடிந்து கருவறை மண்டப வாயில் வழி உள்ளே நுழைந்தால் மூலவர் கருவறையில் கிழக்கு நோக்கி எழுந்தருளியுள்ளார். இங்கு சிவன் சுயம்பு மூர்த்தியாக அருள்பாலிக்கிறார். ஆபத்தம்ப முனிவர், நான்கு வேதங்களும் வழிபட்ட சிறப்பைப் பெற்ற தலம். இறைவன் கருவறை விமானம் உருண்டை வடிவத்திலுள்ளது. அம்பாள் தெற்கு நோக்கி தரிசனம் தருகிறாள்.


திருஞானசம்பந்தர் இத்தலத்து இறைவன் மேல் பாடியருளியுள்ள இப்பதிகம் 2-ம் திருமுறையில் இடம் பெற்றுள்ளது. இந்த ஊரைச் சேர்ந்தவர்கள் அடிக்கடி இத்தல இறைவனின் திருமேனி மேல் பாம்பு ஊர்வதாகக் கூறி, அதற்கு ஞானசம்பந்தரின் பதிகத்தின் முதல் பாடலில் வரும் "பாலூரும் மலைப்பாம்பும் பனிமதியும் மத்தமும் மேலூரும் செஞ்சடையான்" என்னும் இவ்வூர்த் தேவாரப் பகுதியைக் காட்டுவர்.

பாலூரும் மலைப்பாம்பும் பனிமதியும் மத்தமும்
மேலூரும் செஞ்சடையான் வெண்ணூல்சேர் மார்பினான்
நாலூர் மயானத்து நம்பான் தன் அடிநினைந்து
மால் ஊரும் சிந்தையர்பால் வந்து ஊரா மறுபிறப்பே.  

சூடும் பிறைச்சென்னி சூழ்காடு இடமாக
ஆடும் பறைசங்கு ஒலியோடு அழகாக
நாடும் சிறப்பு ஓவா நாலூர் மயானத்தைப்
பாடும் சிறப்போர் பால் பற்றாவாம் பாவமே. 

கல்லால் நிழல்மேவிக் காமுறு சீர் நால்வர்க்கு அன்று
எல்லா அறன் உரையும் இன் அருளால் சொல்லினான்
நல்லார் தொழுது ஏத்தும் நாலூர் மயானத்தைச்
சொல்லாதவர் எல்லாம் செல்லாதார் தொன்னெறிக்கே. 

கோலத்து ஆர் கொன்றையான் கொல் புலித்தோல் ஆடையான்
நீலத்து ஆர் கண்டத்தான் நெற்றி ஓர் கண்ணினான்
ஞாலத்தார் சென்று ஏத்தும் நாலூர் மயானத்தில்
சூலத்தான் என்பார்பால் சூழாவாம் தொல்வினையே. 

கறை ஆர் மணிமிடற்றான் காபாலி கட்டங்கன்
பிறை ஆர் வளர்சடையான் பெண்பாகன் நண்பாய
நறை ஆர் பொழில் புடை சூழ் நாலூர் மயானத்து எம்
இறையான் என்று ஏத்துவார்க்கு எய்துமாம் இன்பமே. 

கண் ஆர் நுதலான் கனல் ஆடு இடமாகப்
பண் ஆர் மறைபாடி ஆடும் பரஞ்சோதி
நண்ணார் புரம் எய்தான் நாலூர் மயானத்தை
நண்ணாதவல் எல்லாம் நண்ணாதார் நன்னெறியே. 

கண்பாவு வேகத்தால் காமனை முன் காய்ந்து உகந்தான்
பெண்பாவு பாகத்தான் நாகத்தோல் ஆகத்தான்
நண்பார் குணத்தோர்கள் நாலூர் மயானத்தை
எண்பாவு சிந்தையார்க்கு ஏலா இடர்தானே.  

பத்துத் தலையோனைப் பாதத்து ஒருவிரலால்
வைத்து மலையடர்த்து வாளோடு நாள் கொடுத்தான்
நத்தின் ஒலி ஒவா நாலூர் மயானத்து என்
அத்தன் அடி நினைவார்க்கு அல்லல் அடையாவே. 

மாலோடு நான்முகனும் நேட வளர் எரியாய்
மேலோடு கீழ் காணா மேன்மையான் வேதங்கள்
நாலோடும் ஆறு அங்கம் நாலூர் மயானத்து எம்
பாலோடு நெய்ஆடி பாதம் பணிவோமே. 

துன்பாய மாசார் துவராய போர்வையார்
புன்பேச்சுக் கேளாதே புண்ணியனை நண்ணுமின்கள்
நண்பால்  சிவாயவெனா நாலூர் மயானத்தே
இன்பாய் இருந்தானை ஏத்துவார்க்கு இன்பமே. 

ஞாலம் புகழ்காழி ஞானசம் பந்தன்றான்
நாலு மறை ஓது நாலூர் மயானத்தைச்
சீலம் புகழாற் சிறந்து ஏத்த வல்லாருக்கு
ஏலும் புகழ் வானத்து இன்பாய் இருப்பாரே. 

மூலவர் ஞானபரமேஸ்வரர்


அம்பாள் ஞானாம்பிகை

மூலவர் ஞானபரமேஸ்வரர் மற்றும் அம்பாள் ஞானாம்பிகை புகைப்படங்கள் அனுப்பி உதவியவர் நாலூர் மயானம் கிராமத்தைச் சார்ந்த செல்வி அனுசுயா கலியமூர்த்தி அவர்கள்


திருநாலூர் மயானம் ஞானபரமேஸ்வரர் ஆலயம் புகைப்படங்கள்


ஆலயத்தின் முகப்பு வாயில்


வள்ளி தெய்வானை சமேத முருகர்


நவக்கிரக சந்நிதி


தெற்கு வெளிப் பிரகாரம்


இறைவன் கருவறை விமானத்தில் மகாவிஷ்ணு


இறைவன் கருவறை விமானத்தில் பிரம்மா